Primeiro balance

O tenente de alcalde e presidente do Consorcio do Festival Internacional de Cine de Ourense, Alexandre Sánchez Vidal; a concelleira de Cultura, Isabel Pérez, e o director-xerente do certame, Enrique Nicanor, realizaron un primeiro balance da cita cinematográfica, a un día de coñecer o palmarés final e a gala de clausura do evento.

Alexandre Sánchez Vidal destacou as tres conferencias maxistrais do programa de produtores europeo EAVE e o Foro Academia Aberta da Axencia Galega do Audiovisual, como as actividades que espertaron máis interese entre os ourensáns.

Aclarou que o Festival ‘ofreceu unha oportunidade única de gozar da presenza e o diálogo de directores, produtores e actores do máis granado do panorama audiovisual independente’, sinalando que iso ‘é todo un luxo’.

Sánchez Vidal apuntou por último que lle consta que os cineastas estranxeiros convidados ‘quedaron moi satisfeitos con Ourense e co trato recibido, e ese é un mérito de tódolos ourensáns’ polo que ‘a un día do peche do certame podemos estar orgullosos da nosa cidade e do noso festival’.