Orson The Kid

Os alumnos de distintos centros educativos da cidade tiveron a ocasión de asistir, no marco do Festival, á proxección de ’Os veraneantes’. Un proxecto único no mundo xa que a longametraxe realizárona mozos de entre 13 e 15 anos pertencentes á escola de Orson the Kid.

O director da película, Jorge Viroga, acompañado de dous alumnos e membros do equipo de rodaxe, Javier Sanz (protagonista) e Alejandro Sastre (responsábel de son), explicou que ‘trátase dun proxecto que naceu na escola de cine de nenos e mozos en Orson. Esta xa é a segunda longametraxe que fixemos, ademais de 27 curtas. Na nosa escola, os alumnos reciben unha formación clásica e o tema do cine é, sobre todo, para que aprendan a traballar en equipo’.

O proceso de creación desta longa, que xa percorreu varios festivais, comezou cunha convocatoria de ideas de temática social da que nesta ocasión saíu a xenofobia. Despois iniciouse o tempo das ideas e unha pequena sinopse. Para ‘Os veraneantes’ inspiráronse no conto ‘Boneca zíngara’, ‘pero só tomaron unha idea, ollo, que o conto orixinal son unhas 10 follas e o guión uns 117, verás que hai diferenzas’, matizou o director Viroga.