Gala inaugural

O director xerente do Festival de Cine Internacional de Orense, Enrique Nicanor, arroupado por autoridades, xurado e directores, exerceu de mestre de cerimonias no acto de apertura da 13ª edición.
Tras un cóctel rápido e multitudinario, a gala transcorreu de forma fluida. De feito, o presidente do Consorcio do Festival de Cine e tenente de alcalde, Alexandre Sánchez Vidal, iniciou chanceando o seu discurso: ‘Ameazo con ser menos breve có ano pasado’.

Con múltiples citas cinematográficas (Truffaut, Berlanga e mesmo o ‘Springfield’ dos Simpsons), saudou ás autoridades da Xunta presentes (Tereixa Paz, Alfredo Suárez Canal, Ánxela Bugallo e Rubén Lois) para se seguido saudar ‘ao alcalde de todos, Paco’, para quen pediu un aplauso e a quen incluiu no seu discurso.

‘Cando ti e máis eu estabamos na oposición, había quen dicía que se chegabamos a gobernar seriamos un ‘Godzilla’ ou un verdugo para o festival’, facendo seu o compromiso de que o Concello e a Deputación ‘seguiremos a agarimar a este adolescente’. E rematou augurando un brillante desenvolvemento ao certame aludindo neste sentido ao equipo de Nicanor, ‘Os sete magníficos’.

Tralos discursos políticos, chegou a gala. Rubén Riós e Uxía Blanco foron os condutores que deron paso ao espectáculo de Mercedes Peón (a artista mesturou a súa voz e o seu virtuosismo musical coa proxección de imaxes e a narración dunha historia sobre a evolución) e á película documental que inaugurou o certame.