Os cineastas españois Chema García Ibarra (Elche) e Eliazar Arroyo (Castrodeza), xunto co director e a produtora Juan Manuel Betancourt e Natalia Pérez, orixinarios de Colombia, presentaron durante a actividade ‘Encontros co Público’ as súas curtametraxes ‘O ataque dos robots de Nebulosa-5’, ‘Triángulos’ e ‘Rojo Red’, respectivamente, que se exhiben no certame dentro da sección competitiva.
Os directores coincidiron en que o mundo da curtametraxe pasa por unha época ‘difícil’ en canto a orzamentos e recursos de financiación, polo que se viron obrigados a teren que contar ‘historias sinxelas e fáciles de filmar’.
Chema García explicou que na súa curta invirtiu tan só 1.200 euros, ‘polo que tiven que suplir con creatividade e talento a falta de recursos materiais’. Pola súa banda a vallisoletana Eliazar Arroyo insistiu en que malia recibir algunhas axudas e subvencións institucionais, ‘non foron abondo para producir curtametraxes cunha pre e post produción destacada’.
Nesta liña pronunciouse a produtora colombiana Natalia Pérez, que animou ás salas de cine en Galiza a promocionaren e proxectaren as curtametraxes locais de cada rexión. No seu país a exhibición de curtametraxes subiu grazas a que ‘o goberno dota con subvencións e descontos fiscais ás salas de cine por proxectaren curtas dos novos valores que xorden en Colombia’.
Por último, Juan Manuel Betancourt, director da cinta ‘Rojo Red’, que narra a historia dun neno que escapa da súa casa ao non querer poñer os seus zapatos ortopédicos, descubrindo na rúa un mundo fantástico, explicou que o mundo da curtametraxe ‘para poder destacar debe aproveitar os novos medios de creación e difusión’, coma teléfonos móbiles, cámaras de vídeo caseiras e internet, para dar saída aos seus produtos audiovisuais
